ឡាវ៖ ពិធីដង្ហែក្បួនអគ្គិជ័យកីឡា និងភ្លើងគប់កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ បានចាប់ផ្ដើមហើយនៅព្រឹកថ្ងៃទី២៥ ខែមេសា នេះ ជាមួយកំណត់ត្រាថ្មី ក្នុងការដង្ហែក្បួនលើចម្ងាយផ្លូវជិត ៦គីឡូម៉ែត្រ ឆ្ងាយជាងបណ្ដាប្រទេសផ្សេងៗ។

ពិធីដង្ហែនេះ ធ្វើឡើងក្រោមវត្តមានរដ្ឋលេខាធិការក្រសួងទេសចរណ៍ និងជាបេសកជនពិសេស CAMSOC លោក ហោ សារុន និងឯកអគ្គរាជទូតកម្ពុជាប្រចាំប្រទេសឡាវលោកស្រី ថោង សុគន្ធារី ព្រមទាំងរដ្ឋមន្ដ្រីការិយាល័យនាយករដ្ឋមន្ដ្រី និងជារដ្ឋមន្ដ្រីទីស្ដីការគណៈរដ្ឋមន្ដ្រីឡាវ លោក Slunaxay Sounnalath រួមទាំងមន្ដ្រីជាន់ខ្ពស់ឡាវ និងឯកអគ្គរដ្ឋ/រាជទូតបណ្ដាប្រទេសក្នុងតំបន់ប្រចាំទីក្រុងវៀងច័ន្ទន៍ជាច្រើនរូបផងដែរ។

ក្បួនដង្ហែអគ្គិជ័យកីឡា និងភ្លើងគប់កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ នៅប្រទេសឡាវ នេះ មានអ្នកចូលរួមជាង ១ ៥០០នាក់ ដែលបានចូលរួមដង្ហែដោយផ្ទាល់ និងឈរអបអរសាទរតាមដងផ្លូវ ពីស្ថានទូតកម្ពុជាប្រចាំទីក្រុងវៀងច័ន្ទន៍ ឆ្ពោះទៅចេតិយវត្ត Pra That Laung។

ប្រទេសឡាវ គឺជាប្រទេសចុងក្រោយ បន្ទាប់ពីដង្ហែរួចរាល់ចេញពីប្រទេសថៃ សិង្ហបុរី ម៉ាឡេស៊ី ទីម័រខាងកើត ឥណ្ឌូណេស៊ី ហ្វីលីពីន វៀតណាម និង មីយ៉ាន់ម៉ា។

គួរឱ្យដឹងដែរថា ភ្លើងគប់កីឡានឹងដង្ហែឆ្ពោះមកកម្ពុជាវិញតាមខេត្តស្ទឹងត្រែង នៅថ្ងៃទី២៧ ខែមេសា ឆ្នាំ២០២៣ ដើម្បីបន្តដង្ហែនៅតាមខេត្តជាប់បឹងទន្លេសាប ដោយដង្ហែចេញពីខេត្តស្ទឹងត្រែង ឆ្ពោះទៅខេត្តក្រចេះនៅថ្ងៃទី២៨ ខែមេសា បន្តទៅខេត្តកំពង់ឆ្នាំងនៅថ្ងៃទី២៩ មេសា និងបន្តមកខេត្តជុំវិញបឹងទន្លេសាបដទៃទៀត ចុងក្រោយនឹងបន្តដង្ហែមកទីលានពហុកីឡដ្ឋានជាតិមរតកតេជោដែលជាកន្លែងបើកពិធីប្រកួតស៊ីហ្គេម និងប៉ារ៉ាហ្គេមនៅថ្ងៃទី៥ ខែឧសភា ឆ្នាំ២០២៣៕